في الستينات، قرر عادل إمام وسعيد صالح، وصلاح السعدني وأخوه الكاتب محمود السعدني، إنهم يدخلوا اختبارات معهد التمثيل،
محمود السعدني مكنش بيمثل من أساسه، لكنه لما راح كان سامع إن اللي هينجح في اختبارات المعهد هيصرفوله 7 جنية..
الغريب إن كل دول سقطوا في الاختبار، مع إنهم كانوا مكسرين الدنيا على مسرح الجامعة، ومنجحش غير محمود السعدني، اللي كان رايح يهزر.
في بداية السبعينات إتعاقب كام فنان على كام كاتب، بسبب توقعيهم على بيان بيرفضوا فيه حالة اللاسلم واللا حرب اللي كانت بتعيشها مصر في وقتها.
ومن الفنانين اللي إتعاقبوا كان الفنان صلاح السعدني، واللي كانت مصيبته مصيبتين، لأنه وقع على البيان، ولإنه أخو الكاتب محمود السعدني، اللي كان مقضيها تريقة وسخرية على الوضع السياسي في مصر.
وعقاب صلاح السعدني كان بوقفه عن التمثيل، ومنعه من الظهورعلى الشاشة نهائي، فاشتغل مدير لفرقة الفنانين المتحدين، واللي كانت بتعرض مسرحية مدرسة المشاغبين.
ومن خلال شغله قدر يحل مشكلات الفرقة، سواء اللي بتعملها سهير البابلي بسبب خروجها عن النص، أو المشاكل اللي بتحصل بين عادل إمام وسعيد صالح، بسبب تعمد الاتنين إنهم يعلوا على بعض في إضحاك الجمهور.
ده غير إنه قدر يقنع أحمد ذكي بالتمثيل في المسرحية، كل ده كان عادي.. لكن اللي مش عادي؛ إن صلاح السعدني يلعب دور بهجت الأباصيري، أو دور عادل إمام في المسرحية، و لمدة 3 شهور بحالهم.
والسبب كان مرض عادل إمام، وعلاجه من مرض فيروس إلتهاب الكبد الوبائي، واللي كان مرض خطير وقتها..
وقصة صلاح السعدني مع التمثيل بدأت لما دخل كلية الزراعة، بعد نجاحه في الثانوية العامة، وقتها مكنش مقرر إنه هيمثل، أو حتى كان باين عليه إنه عنده هواية التمثيل، لكن كان معاه في الجامعة إتنين من شباب الممثلين اللي مكسرين الدنيا في مسرح الجامعة، وهما عادل إمام وسعيد صالح.
وقدر عادل إمام إنه يقنع صلاح السعدني بدخول مجال التمثيل، واختاره كمان معاه في مسرحية ثورة الموتى، واللي كانت بتتقدم على مسرح الجامعة، وبعد الجامعة إنضم عادل إمام وسعيد صالح لفرقة مسرح التلفزيون وخدوا صاحبهم صلاح السعدني معاهم..
وإبتدا التلاتة يشقوا طريقهم في التمثيل، وابتدوا يعملوا أدوار صغيرة، وكان أول دور إشترك فيه السعدني هو مسلسل الرحيل..
وابتدا نجم صلاح السعدني يلمع في السبعينات، خصوصًا في الفترة اللي اتعملت فيها أفلام عن حرب أكتوبر، زي فيلم الرصاصة لا تزال في جيبي، وزي أغنية على الممر.
ومن أشهر أفلامه.. فيلم الأرض، والمراكبي، وخلف أسوار الجامعة، وفوزية البرجوازية، وكونشرتو درب سعادة، وغيرهم..
وإذا كان نجم صلاح السعدني لمع في السينما في السبعينات، فنجمه ابتدا يعلى في التلفزيون مع التمانينات، واتوهج في التسعينات، وفيها أخد لقب عمدة الدراما المصرية، بعد ما أبدع في دور العمدة في مسلسل ليالي الحلمية، ومن أهم مسلسلاته أرابيسك، وأبنائي الأعزاء شكراً، والناس في كفر عسكر، والرحايا، وحلم الجنوبي وغيرهم.
وغير السينما والتلفزيون، إشتغل صلاح السعدني في المسرح، ومن أشهر مسرحياته.. باللو باللو وزهرة الصبار والملك هو الملك، وغيرهم.
أما عن بطاقته الشخصية، فاتولد صلاح الدين عثمان إبراهيم السعدني؛ في 23 اكتوبر، سنة 43، في قرية إسمها كفر القرينين في محافظة المنوفية، واتنقل للقاهرة مع أسرته، وعاش في حارة من حارات مصر القديمة.
وهو الأخ الأصغر للكاتب الكبير محمود السعدني، والفرق بينهم 15 سنة بحالها، والسبب في الفرق ده كله إن 4 من اخواتهم اتوفوا صغيرين، بسبب إن الأم إتجوزت وهيا قاصر، يادوب كان عمرها إتناشر سنة.
وبسبب إن والدته إتجوزت صغيرة، ومقدرتش تراعي أطفالها وماتوا؛ وافق صلاح السعدني إنه يعمل بطولة مسلسل القاصرات، واللي كان بيعمل فيه دور راجل كبير بيتجوز كل فترة من بنت لسه قاصر.
المسلسل إتقدم سنة 2013، ومن بعده اختفى الفنان الكبير صلاح السعدني، ومظهرش تاني على الشاشة.
لكنه اتصدر ترندات جوجل مع بداية السنة دي 2023، والسبب كان انتشار أخبار على معظم المواقع بتتكلم عن وفاته.
لكن الأخبار طلعت مش حقيقية، ومع ذلك فضل اختفاء صلاح السعدني عامل لغز لكتير من الناس.
لكن اللغز اتحل، وانكشف إن الفنان الكبير صلاح السعدني مريض من فترة كبيرة، وبيعاني من أمراض بتصعب عليه الحركة، وإنه اختار إنه ما يمثلش تاني، وإنه اكتفى بكل اللي قدمه على الشاشة.
وإن جيتوا للحق، مش الحالة الصحية لوحدها هيا السبب في غياب النجم صلاح السعدني عن الشاشة.
لكن الموضوع ليه علاقة بوفاة أكتر من صديق مقرب ليه في 2010، منهم أخوه الكبير محمود السعدني، واللي كان صلاح بيقول عليه إنه مش بس الأخ الأكبر، ولا الأب، لكنه كان مصر بأهلها وثقافتها وبتاريخها وبحاراتها بالنسبة له.
وغير محمود السعدني إتوفى في نفس السنة الكاتب الكبير أسامة أنور عكاشة، والفنان عبد الله فرغلى، والاتنين كانوا من أعز أصدقائه.. الغريب بقى إن الـ 3 أشخاص دول ماتوا كلهم في شهر مايو، وده اللي عيشه في اكتئاب وعزلة.
والفنان صلاح السعدني متجوز من خارج الوسط الفني، وعنده بنت إسمها ميريت ودي إشتغلت في الفن شوية، وبعدها اتحجبت واعتزلت التمثيل، وبقت بتقدم برامج دينية على قناتها على يوتيوب.
وإبنه أحمد السعدني، وطبعًا كلنا عارفين انه اشتغل في التمثيل زي والده، والبنت والولد الاتنين إتجوزوا وخلفوا..
والفنان صلاح السعدني واللي اشتهر بالمثقف الكبير، إتكرم أكتر من مرة، منها تكريمه عن مجمل أعماله بمهرجان القاهرة للدراما سنة 2022.
