هل فعلًا إتآمرت وردة الجزائرية، ونهلة القدسي زوجة عبد الوهاب على ميادة الحناوي، ودمروا مستقبلها الفني وطردوها من مصر؟
وهل ارتبطت بعلاقة حب مع بليغ حمدي فسافر وراها، وقعد خمس سنين من عمره برة مصر بسببها؟
طيب واذا كانت حبت بليغ فإيه علاقتها بمحمد سلطان، زوج صديقتها المطربة فايزة أحمد؟؟
إتولدت ميادة بكري الحناوي سنة 56، في حي الجلوم الكبرى، قريب من قلعة حلب الشهيرة.
واتولدت في أسرة فنية بتحب الغنا والموسيقى، فوالدتها عدوية النجار، واللي كانت صاحبة صوت مميز وجميل، وكانت بتغني في حفلات الكبار، وخصوصًا حفلات النساء.
وكانت في الحفلات دي بتاخد معاها بناتها الاتنين، ميادة وفاتن، والاتنين غنوا من طفولتهم، وكانت أصواتهم من أجمل ما يمكن.
وأختها فاتن سبقتها في الشهرة والغنا، وأخدت جوايز كتير في مهرجانات عربية للغناء، لكنها اعتزلت بعد الزواج بطلب من زوجها.
أما ميادة فكان طريقها هيختلف برضه، لولا الصدفة، فهيا اتجوزت في سن صغير، وكانت الزوجة التانية لوزير الداخلية السوري عدنان دباغ، لكنه توفى وهيا لسه 18 سنة، لكن أثناء حياته كان في ضيافته صديقه موسيقار الأجيال محمد عبد الوهاب
الغريب إن عبد الوهاب من الناس اللي كانوا بيخافوا من السفر، ولما استضافه الوزير عدنان دباغ كانت دي من المرات النادرة اللي اضطر يسافر فيها.
المهم إنه سمع في الوقت ده ميادة وهيا بتغني مع اختها، وأقنعها تيجي القاهرة علشان يتبناها فنيًا.
وبعد وفاة الوزير، سافرت ميادة مع أخوها عثمان لمصر، وقدملها عبد الوهاب اللي وعدها بيه، وجهزلها حفلات كبيرة، وعملها عدد من أجمل الألحان، وأطلق عليها إسم مطربة الجيل، واتفقلها مع كبرى الشركات عشان تنتجلها ألبومات، وكانت لسة وقتها قاصر، فكان الورق بيسافر سوريا يتمضي من الأب وبعدين يرجع القاهرة.
وبدأت ميادة بقوة، وتبني عبد الوهاب ليها اختصرلها كتير في مسيرتها الفنية، وفـ وقت قصير أصبحت من عمالقة الغناء في الوطن العربي، واتحط إسمها مابين نجمات الغناء الكبار، أم كلثوم ووردة وفايزة ونجاة.
وابدت تتعاون مع ملحنين تانين غير عبد الوهاب، واداها بليغ حمدي أجمل ألحانه، وكتبلها كمان أجمل كلمات، زي أنا بعشقك، والحب اللي كان.
واتربعت ميادة على عرش الأغنية في وقت قصير، وكانت حفلاتها بتعوض رحيل أم كلثوم وفايزة أحمد.
لكن تأتي الرياح بما لا تشتهي السفن زي ما بيقولوا.. وبسبب اهتمام بليغ حمدي ومحمد عبد الوهاب بميادة، بدأت الغيرة تلعب لعبتها، في قلب إتنين من أهم السيدات وقتها.
الأولى المطربة الكبيرة وردة، واللي رغم طلاقها من بليغ حمدي إللا إنها غارت جدًا عليه من ميادة، وابتدت تقول إن صوت ميادة مش حلو.
لكن ومع اهتمام الجمهور بميادة، وحفلاتها الكبيرة، إبتدا الموضوع ياخد مع وردة شكل تاني، والعهدة على ميادة.. لإن الكلام ده جه على لسانها في كتير من المواقع..
طيب هو إيه الشكل التاني؟؟
هو الحقيقة ممكن نسميه الوش التاني، لكن هحكيلك عليه لما أحكيلك عن السيدة التانية اللي كانت برضه بتغير من ميادة، وهيا السيدة نهلة القدسي زوجة موسيقار الأجيال محمد عبد الوهاب.
والسيدة نهلة القدسي خافت من اهتمام عبد الوهاب بميادة، واصراره على تنظيم حفلات كبيرة جدًا ليها، فقالت الموضوع كده ما يطمنش.
وهنا اتفقت هيا والمطربة الكبيرة وردة على إزاحة ميادة الحناوي نهائيًا.. فعملوا ضدها مؤامرة وطلبوا من وزير الداخلية وقتها النبوي اسماعيل إنه يخرجها من مصر.
وفعلًا تم استدعاء ميادة لمبنى الهجرة والجوازات، ومنها للطيارة بدون إبداء أسباب، حتى شنطة هدومها قالولها هنبعتها وراكي..
سافرت وقتها للبنان، وبعد عشرين يوم حاولت ترجع لكنها لقيت إنها ممنوعة من دخول مصر،واتمنعت كمان إذاعة أغانيها، ومعرفتش تدخل مصر غير بعد 13 سنة، لما اتوفى الموسيقار الكبير محمد عبد الوهاب.
ومن بعدها ابتدت تغيب ميادة بالسنين، وتختفي لأسباب شخصية، ترجع بكام أغنية أو بألبوم وترجع تختفي تاني، وده اللي خلق إشاعات كتير عنها، معظمها بتقول إنها مريضة.
لكنها خرجت بتصريح من فترة كبيرة وقالت إن وفاة أختها الوحيدة، وعملية القلب المفتوح اللي عملها أخوها ، أثروا في نفسيتها وكانوا السبب في ابتعادها عن الساحة الفنية..
وخلال مسيرتها قدمت ميادة عدد كبير من الألبومات الناجحة، زي ثورة الشوق، والليالي، وجالك كلامي، وعرفوا ازاي، وغيرهم..
ومن أشهر أغانيها، أنا بعشقك، ومهما يحاولوا يطفوا الشمس، وأنا مخلصالك.. وغيرهم.
أما عن حياتها الشخصية فاتجوزت ميادة مرتين، الأولى من وزير الداخلية السوري عدنان دباغ، وكانت الزوجة التانية.
أما جوازها لتاني مرة فكان من رجل الأعمال السوري مهند أحمد، لكن الجواز ده انتهى بالانفصال بعد عشر سنين.
ومحصلش إن ميادة خلفت من أي واحد من أزواجها، وتقريبًا ده كان سبب طلاقها من مهند أحمد بحسب تصريحاته بعد الطلاق.
وبرغم إنها إتجوزت لمرتين، لكن كان فيه أخبار عن ارتباطها بقصص حب مع شخصيتين كبار في الوسط الفني.
الأول بليغ حمدي، واللي بتقول المصادر إنهم فعلًا حبوا بعض، وانه قعد 5 سنين جنبها، ما بين سوريا ولبنان علشان يلحنلها بعد ما اتمنعت من دخول مصر.
أما الشخصية التانية فهو الملحن الكبير محمد سلطان، واللي كان متجوز من صديقتها فايزة أحمد.
لكن بعد وفاة فايزة أعلنوا عن ارتباطهم، وعن تجهيزاتهم للزواج، لكن الموضوع إنتهى مرة واحدة وبعدوا عن بعض واتلغى الجواز.
والحقيقة كان بودي أقولكم إن آخر خبر عن ميادة الحناوي هو خبر فني، بس للأسف آخر خبر إتكلم عن ميادة كان خبر خضوعها مؤخرًا لعملية تجميل، وتسريب الدكتور لصورها بالخطأ قبل وبعد العملية.
