رغم إنها كانت ممثلة إغراء، ومشهورة بآداء الأفلام اللي مش ولا بُد، إللا إنها إتجوزت أمير من العيلة المالكة، وأخدت لقب أميرة.
ورغم إنها عاشت في قصر كبير وكان عندها خدم وحشم؛ وكل أوامرها كانت مجابة، لكنها حاولت تنتحر مرتين، واتلحقت في آخر لحظة.
وبعد ما كانت متربعة على عرش السينما وبتاخد أعلى أجر، إللا إنها إعتزلت لما شافت بعنيها معجزات مش ممكن تحصل لحد، فقالت آمنت بالله وتركت الدنيا ورا ضهرها..
بكلمك عن شمس البارودي، نجمة إغراء السينما المصرية من الستينات للتمانينات، ورحلتها العجيبة من الإغراء للمعجزات..
في الفترة الأخيرة إتسربت أخبار في عدد كبير من المواقع؛ إن الفنانة المعتزلة شمس البارودي هترجع للتمثيل تاني.
وردًا على الأخبار نشرت شمس البارودي وثيقة رسمية قديمة، كانت نشرتها في التمانينات، الوثيقة بتتبرأ فيها من كل أفلامها، سواء اللي بتتعرض حاليًا، أو اللي هتتعرض مستقبلًا، وأكدت إنها إعتزلت الفن نهائيًا، وإن اللي مُصِر يعرض أفلامها هيشيل ذنبه وذنبها، لإنها عملتها بجهل منها..
بس استنى.. هو يعني إيه جزئية الأفلام اللي هتتعرض مستقبلًأ؟ هيا مش كل أفلامها اتعرضت من زمان؟
هفهمك..
شمس البارودي كانت واحدة من أجمل وأشهر ممثلات الإغراء في مصر والوطن العربي، وكان ليها أفلام مش قد كده، وعشان كده فيه عدد من أفلامها إتمنع من العرض.
هنا بقى مربط الفرس، أهي الأفلام دي هيا اللي تقصدها، واللي ابتدت تتعرض على النت، من بعد ما نزلت الوثيقة، ونفت إنها هترجع للتمثيل.
اللي بيعرضوا الأفلام بيصطادوا في المية العِكرة، يعني حابين يكسبوا ماديًا نتيجة تصدر شمس البارودي لمحركات البحث حاليًا.
ومن ناحية تانية بيسترزقوا؛ لإن الإثارة والإغراء اللي بيعرضه الفيلم بيلموا مشاهدات كتير..
طيب هيا مين شمس البارودي وإيه قصة إعتزالها، وأفلامها الممنوعة؟
شوف ياسيدي.. زمان بعد حرب 67، وقعت السينما المصرية، وكان إنتاج الأفلام مقتصر على نوعية من الأفلام الجريئة، وبين قوسين الساخنة.
وقتها كان المنتجين والممثلين بيسافروا برة مصر يصوروا الأفلام دي، واللي كانت عبارة عن مجموعة مشاهد مثيرة وبس.
يعني الفيلم لا كان بيعتمد على قصة، ولا كان بيوصّل رسالة ولا يحزنون، أفلام للإثارة وبس عشان الشعب يتلهي..
ووقع في الخية دي عدد من الفنانين المصريين الكبار، وكان فيه كام ممثلة معروفين، هما اللي شالوا على كتافهم مرحلة أفلام الإثارة دي، وشمس البارودي كانت واحدة منهم..
أما عن بياناتها، فإسمها الحقيقي شمس الملوك جميل عزت البارودي، واتولدت في 4 اكتوبر سنة 45، في منطقة وراق الحضر بالجيزة، واتنقلت بعد فترة من الوراق لحدايق المعادي.
جدها لوالدها من أصول سورية، من عيلة البارودي المعروفة، وإتنقل لمصر عشان الشغل وإبنه جميل دخل الجامعة في القاهرة، وبعد ما اتخرج إشتغل مدير لمصنع كافوري للغسل والنسيج.
أما والدتها فمصرية من أصل تركي، كانت متزوجة وانفصلت، وبعدها اتجوزت من والد شمس البارودي.
وشمس هيا البنت الكبيرة لأسرة بتتكون من 6 بنات وولد، ده غير أخت من الأم إسمها نيفان، وتبقى والدة الفنانة غادة عادل..
درست شمس البارودي في المعهد العالي للفنون المسرحية، وبدأت تجاربها الأولى في التمثيل في بداية الستينات..
وقدمت ف حدود 50 فيلم، ومن أشهر أفلامها حمام الملاطيلي، والمتعة والعذاب، والجبان، ورحلة العمر، وهي والرجال، وإمرأة لكل الرجال، وغيرهم..
ومشيت معاها الدنيا، وبسرعة الصاروخ بقت بطلة بتاخد أعلى أجر في السينما المصرية، لكنها في التمانينات سافرت للعمرة مع والدها، ورجعت من هناك متغيرة 180 درجة.
لإنها أثناء آداء العمرة، قررت تعتزل التمثيل نهائي.
وفعلًا رجعت من العمرة ولبست النقاب، واتبرأت من كل أفلامها بالوثيقة اللي نشرتها وقتها، واللي رجعت نشرتها مؤخرًا..
واللي حصل في العمرة مش ممكن حد يتوقعه، لإنها كانت في زيارة قبر النبي عليه الصلاة والسلام، وشافته بعنيها عند القبر، وقتها اتهزت من جواها وقعدت تصرخ، حبيبي يا رسول الله، حبيبي يارسول الله.
بعدها وهيا بتصلي في مكة، شافت بعنيها فاتحة الكتاب كاملة بمعانيها، وبعدها إتكررت معاها المعجزات، ورجعت من هناك شخصية مختلفة، ومن النقيض للنقيض.
المهم إنها إعتزلت في فبراير سنة 84، وبدأت حياة مختلفة، بتحضر دروس الدين وتحفظ القرآن، وتعمل موائد الرحمن.
طبعًا إتعرض عليها مبالغ كبيرة جدًا علشان ترجع تمثل، أو حتى تقدم برامج دينية، لكنها أصرت على الاعتزال النهائي.
وفضلت بعيدة عن الأضواء ييجي 40 سنة، ومظهرتش تاني إللا مؤخرًا بحجابها الكبير، وفي مناسبات عائلية وبس.
المناسبة الوحيدة اللي شذت عن القاعدة، لما خرجت في الفترة الأخيرة تدافع عن زوجها الفنان حسن يوسف، لإنه كان بيتعرض لهجوم من أكتر من طرف..
أما عن حياتها الشخصية، فشمس البارودي إتجوزت مرتين.
الأولى سنة 69 من الأمير السعودي خالد ابن سعود ابن عبد العزيز، وأخدت وقتها لقب أميرة، وعاشت في قصر كبير في منطقة الأهرامات.
لكن كان بينها وبين الأمير مشاكل كتير، بسببها حاولت تنتحر مرتين، الأولى أخدت أقراص أسبرين ولحقها الأمير بعد ما كانت هتدخل في غيبوبة.
والتانية قطعت شرايين إيديها وبرضوا اتلحقت، وفي النهاية انفصلوا بعد 3 شهور، وبعد انفصالها بـ3 سنين ، إرتبطت بعلاقة حب مع الفنان حسن يوسف، واتجوزوا سنة 72.
لكنهم إنفصلوا بعد فترة بسبب رغبة حسن يوسف إنها تعتزل، وف أثناء انفصالهم إتعرفت على المخرج حسام الدين مصطفى، وارتبطوا بعلاقة حب وجهزوا للجواز، لكنها تركته قبل كتب الكتاب، ورجعت لحسن يوسف.
ومازالوا سوا لحد النهاردة، وخلفوا أربع أولاد، هما ناريمان وعمر، ومحمود وعبدالله.
وإتقال مؤخرًا إن الفنانة شمس البارودي هتكتب كتاب عن سيرتها الذاتية، تحكي فيه رحلتها من الظلمات إلى النور، لكنها نفت الكلام ده، وقالت إن الكتاب عبارة عن تجميع لمجموعة من الأحاديث الصحفية القديمة اللي إتعملت معاها.
لكن فيه تصريح على لسان إبنها عمر إنه هيعمل فيلم وثائقي عن والدته، لكن مقالش إمتى ولا هيتكلم عن إيه بالتحديد في حياة والدته.
