في التاريخ المصري، فيه فترة إسمها فترة مراكز القوى، ودي فترة مثلتها السينما كتير جدًا، ومن أشهر الحكايات اللي اتكلمت عنها السينما وفهمتنا موضوع مراكز القوى، هو إن الفيلم يصورلك مسئول في مكان حساس تعجبه واحدة، فيجبرها تعيش معاه حتى لو متجوزة، واذا عارضت أو جوزها اعترض، فهو يا بيتقتل يا بتتلفقله مصيبة توديه ورا الشمس.. وده إللي حصل بالظبط مع الفنانة الجميلة سهير فخري، ودي الشخصية اللي اتكلم عن مأساتها مسلسل سوق العصر.
سهير فخري من جميلات السينما المصرية، ومن أرق الفنانات اللي مثلوا في زمنها الجميل، وأكيد كتير مننا ميعرفهاش، لكنها بتلفت نظره أول ما يشوفها في فيلم قديم، ويبتدي يسأل، مين الفنانة الجميلة دي وراحت فين، انا بقى هقولك هيا مين وراحت فين، وقصتها مع مراكز القوى..
إتولدت سهير فخري في القاهرة في 13 أغسطس سنة 43، لعيلة راقية وثرية، ودخلت الفن وهيا لسة طفلة عندها 5 سنين، وعملت كام فيلم في طفولتها، وبعدين انتظمت في الدراسة وامتنعت عن التمثيل، لكنها رجعت تاني بعد ما أنهت دراستها، وساعدها جمالها ورقتها إنها تشتغل وتشارك في أكتر من عمل سينمائي..
وأثناء تمثيلها لدورها في أحد الأفلام شافها الكاتب الكبير، وأبو القصة البوليسية في مصر، الكاتب والسيناريست محمد حسن كامل المحامي، وهو كان فعلًا محامي وكاتب صحفي، وكاتب روائي، وسيناريست ومنتج..
هنا بدأت قصة حب من النظرة الأولى، وبدأت سلسلة كارثية من المشاكل..
كان محمد كامل أكبر من سهير فخري ب25 سنة، ومع ذلك حبها واتجوزها، وعاشوا حياتهم عادي سنة واتنين وتلاتة، وخلفوا ولدين وكانوا في قمة السعادة..
لكن بتحصل الصدفة البشعة سنة 65 ، وبيتقابل شخص من الأشخاص اللي كانوا في مراكز القوى، بالفنانة الجميلة، فبتعجبه وبينبهر بجمالها وبتدخل دماغه..
الشخص ده هو عبد المنعم أبو زيد، صاحب الشخصية الغامضة، واللي كان الدراع اليمين للمشير عبد الحكيم عامر..
عمل إيه بقى أبوزيد ده، وهد العيلة دي إزاااي؟
هقولك..
الراجل بكل بجاحة، راحلهم البيت، وقعد في الصالون، وحط رجل على رجل، وطلب إيد الست..
طلبها من مين؟؟
طلبها من جوزها..
أه واللهِ زي ما بكلمك.. طلب إديها من جوزها..
طبعَا الزوج شاط وطرده من البيت، وطبعًا ده أقل واجب.
لكن اللي حصل بعدها كان الجحيم بعينه..
أبو زيد بعد ما خرج من البيت قفاه يقمر عيش، قعد على مكتبه، وابتسم ابتسامة السخرية بتاعة عادل أدهم ورفع سماعة التليفون وعمل مكالمة صغيرة..
بعد المكالمة وقفت عربية غريبة تحت البيت عند سهير فخري وجوزها، ونزل منها أربع أفراد طول بعرض بارتفاع، وطلعوا عندها الشقة.
لما رنوا علي الباب وفتحت الشغالة، طلبوا من الشغالة إنهم يقابلوا صاحب البيت محمد كامل.
أول ما ظهر محمد كامل جري عليه الأربع أشخاص ولبسوه قميص بالمقلوب، ونزلوه العربية وسط صريخ مراته وولاده الصغيرين، وفي لمح البصر جريت بيه العربية على مستشفى المجانين..
اتحبس محمد كامل في مستشفى المجانين أربع سنين.. أربع سنين ممنوع أهله يوصلوله، ممنوع يشوفوه أو يعرفوا حاجة عنه..
طيب انتهى الموضوع هنا؟؟ لأ..
لسة دور الزوجة الجميلة، ودي حبسها أبوزيد، لكن حبسها في بيته، بعد ما رفعلها قضية طلاق من جوزها المجنون.
وفعلًا طلقها ن جوزها بالمحكمة، واتجوزها بالإكراه، وحبسها في بيته..
بعد أربع سنين خرج محمد كامل من مستشفى المجانين، لكنه اتنفى للبنان، ومرجعش مصر غير بعد القضاء على مراكز القوة في سنة 71..
أما سهير فخري فـ فضلت على ذمة عبد المنعم أبو زيد لحد ما غضب المشير عامر عليه وحبسه سنة 66..
وغضب عامر إتقال فيه روايتين، الإولى إن أبو زيد سرق صورة خاصة للمشير مع زوجته السرية برلنتي عبد الحميد، واللي هدد سرية الزواج..
أما الرواية التانية، والأقرب للحقيقة فهيا إن شمس بدران، وده واحد من مراكز القوى برضه، إدا كل رجالة المشير مقص حرامية، وفضحهم وعمل القضية اللي اتشهرت بإسم إنحراف مكتب المشير عامر..
وحصل اتهام لابو زيد بالفساد المالي واختلاس أموال الجيش، واتسجن مع تمانية غيره في السجن الحربي، ويقال إنهم إتعرضوا للتعذيب.. وزي ما بيقولوا كما تُدين تُدان..
وكان أبو زيد هيخرج خلاص، لكن لسوء حظه حصلت نكسة 67، وهنا حصل الغضب على المشير عار ورجالته، واتحبس أبو زيد من جديد، وفضل في السجن، لحد ما جه السادات وعمل ثورة التصحيح وشال كل مراكز القوى..
طبعًا في فترة زواجها من أبو زيد إعتزلت سهير فخري التمثيل، لكنها رجعت تاني بعد ما مراكز القوى اتشالت، رجعت تقريبًا سنة 72، ومثلت في حدود عشرين فيلم، لكنها كانت فقدت بريقها فاختفت فجأة عن الساحة..
وبعد ما اعتزلت اتجوزت للمرة التانية من شخصية من خارج الوسط الفني، وحلفت منه ولد..
واختفت نهائي جميلة السينما سهير فخري، واختفت أخبارها، لحد ما إبنها الصغير اللي من زوجها التاني إتجوز من الفنانة رانيا فريد شوقي، وابتدت الصحافة تتكلم عن رجل الأعمال المهندس تامر الصيرفي ابن الفنانة المعتزلة سهير فخري، واللي اتجوز من رانيا فريد شوقي..
واتوفت سهير فخري في هدوء تام في يوم 25 سبتمبر سنة 2018..
وفي النهاية حابين نعرف رأيكم "هل الجمال كان نقمة على الفنانة سهير فخري واتسبب في خراب حياتها وحياة جوزها؟"
