إذا كان سعيد صالح إتسجن سنة 96 بتهمة تعاطي المخدرات، فليه اتسجن في 91 و83؟
وهل صحيح إنه كان داخل الفن كمغني وملحن؟
وإيه حقيقة إنه اتجوز في السر، وهو فوق السبعين سنة وعنده أعراض زهايمر؟
في 2010 قدم سعيد صالح فيلم زهايمر، وبالمناسبة كان آخر أفلامه المعروفة، وقدم فيه شخصية واحد عنده زهايمر، لا هو فاكر حد، ولاعارف هو مين، ولأول مرة كان سعيد صالح بيبكي المشاهد، ولآخر مرة كان المشاهد بيشوفه.
سعيد صالح لما عمل المشهد ده، كان إبتدا يجيله الزهايمر، وكان بيمثل معانته اللي بيعيشها مع أعراض المرض، وبعد ما عمل الفيلم كضيف شرف، عمل فيلم تاني كضيف شرف برضه، لكنه فيلم ما اتعرفش اوي، كان إسمه متعب وشادية.
وبعده إتمكن منه المرض، وإتدهورت حالته الصحية، واتوفى سنة 2014.
وسعيد صالح كان ليه لقب مشهور، هو ملك الخروج عن النص، وده اتسببله في الحبس لأول مرة فـ حياته سنة 83.
والسبب إنه قال جملة في مسرحية لعبة إسمها الفلوس، أعتبرت في وقتها شتيمة سياسية، وتريقة على أنظمة الحكم في مصر، فاتقبض عليه، واتحبس 17 يوم على ذمة التحقيق، لحد ما تم الإفراج عنه..
أما المرة التانية اللي اتحبس فيها، فـكانت سنة 91، و مكنتش بسبب الخروج عن النص، كانت بسبب الخروج على القانون، وتعاطي المخدرات، وبيتقال إنها كانت قضية متلفقة بسبب القضية الأولى، كقرصة ودن يعني، لكنه خرج منها براءة بسبب عدم كفاية الأدلة..
عشان يرجع ويتقبض عليه تاني سنة 96، وبنفس التهمة، لكن المرة دي مخرجش براءة، واتحكم عليه بسنة سجن، وعشرتلاف جنيه غرامة.
إسمه سعيد صالح إبراهيم نجم، إتولد في 31 يوليو سنة 38، في محافظة المنوفية، واتخرج من كلية الآداب جامعة القاهرة سنة 60.
إبتدا حياته الفنية على مسرح الجامعة، مع أصدقاؤه المقربين صلاح السعدني وعادل إمام. لكن اللي اكتشفه وقدمه للمسرح كان الفنان حسن يوسف.
وابتدا سعيدد صالح مشواره الفني في أواخر الخمسينات، وأخد ألقاب كتير في حياته، منها فتى المسرح، وسلطان الكوميديا، وكوميديان المهمشين.
لكن أنا عايزة أفاجئك وأقولك إنه مكنش داخل مجال الفن عشان يمثل، وإنه كان فاكر إن صوته حلو، وكان عايز يغني ويلحن، وأزيدك من الشعر بيت وأقولك إنه لحن فعلًا، لكنه لما حب يدخل نقابة الموسيقيين إترفض.
أما الرفض فكان لسبب وجيه جدًا، ومعرفش إزاي سعيد صالح معملش حسابه.
واللي حصل إنه كان بيلحن وفقًا لسماعه للأغاني وطريقة تلحينها، يعني لا حافظ قواعد، ولا يعرف أساسيات التلحين، تحس كده إن سلطان رمضان السكري، هو اللي كان داخل يمتحن في لجنة إستماع النقابة.
وعلى الرغم من إنه إترفض، إللا إنه لحن وغنا كتير في المسرح والسينما بعد كده، ومن أشهر أغانيه طول النهار شقبان، وعلى إسم مصر، وإحنا النهاردة إيه، وممنوع من السفر.
وقدم سعيد صالح خلال مسيرته في حدود 500 عمل فني، مابين مسرح لسينما لتلفزيون.
وإشتهر عنه إنه بيحب قعدات الناس البسطاء في الشارع، وإنه بيقضي وقته كله على القهاوي، وكان دايمًا يقول إنه بيحب يعيش حياة المهمشين والصعاليك.
واتعرف بإنه صاحب مزاج عالي في التمثيل، وعشان كده مكنش بيعمل أدوار كتير للتلفزيون، كان بيخاف يستنزف طاقته في الدراما، وكان بيرفض أعمال لأنها بتشبه شخصيته الحقيقية، وبيرفض كمان أدوار بسبب إنه ممكن يتشائم منها.
الغريب إنه لما دخل السجن، معملش قلبان، وقلب الموضوع صعبانيات، لأ بالعكس، إتأقلم مع حياة السجن، واندمج مع المساجين ومشاكلهم، وشاف إنه إختبار من ربنا، وخرج بفلسفة جديدة ومختلفة في الحياة.
واتعرف سعيد صالح في السجن بشخص إسمه عمر يوسف، كان هو الشخص اللي أثر فيه جدًا، واتعلم منه حجات كتير.
الشخص ده بقى من أعز أصدقائه فيما بعد، حفظ معاه القرآن، وكان بيصلي معاه، ووعده يعملوا العمرة سوا بعد خروجهم م السجن، وفعلًا بعد خروجه من السجن طلع الحج بدل العمرة، وفضل مواظب على الحج لمدة أربعتاشر سنة متواصل..
أما عن حياته الشخصية فاتجوز سعيد صالح من سيدة إسمها نادية، من خارج الوسط الفني، وخلف منها بنته الوحيدة هند، واللي بتشتغل مونتيرة في التلفزيون حاليًا.
أما جوازته التانية فكانت من ممثلة مش معروفة إسمها شيماء فرغلي، واتجوزها وهو عمره سبعين سنة.
في آخر أيامه إتصاب سعيد صالح بالزهايمر، ومات في 2014، عن 76 سنة، نتيجة أزمة قلبية ودخوله في غيبوبة.
وبخصوص جوازته التانية، فحصلت مشاكل كبيرة بعد وفاة سعيد صالح مابين زوجته شيماء فرغلي، وبنته هند..
وصلت المشاكل إن الزوجة اتهمت هند ووالدتها بمحاولة قتلها هيا وسعيد صالح مرتين، وإنهم حرقوا الشقة بتاعتهم مرة، وسرقوا العفش مرة تانية، وإنهم حرموها من الميراث، وكمان طردوها من العزا، وده خلاها تقف في زاوية جنب الجامع اللي فيه العزا، علشان تاخد العزا في جوزها..
الكلام ده نفته هند سعيد صالح، وقالت إنها كلها محصلتش، وإن زوجة والدها اتجوزته من وراهم في بداية مرضه، في أول ما كانت بتجيله أعراض النسيان، وكانت بتهينه وتضربه، واستغلته كتير.
