الشقيقتان مني وناهد جبر هكذا أصبح شكلهم بعد سنوات من الإختفاء وظهور نادر لأبنائهم وسر إعتزالهم

ما بين التسعينات وسنة ألفين إختفت النجمتين منى وناهد جبر، الإتنين اعتزلوا واختفوا وبعدوا عن حياة الأضواء ومظهروش تاني، لكن النجمتين ظهروا من خلال خبرين على عدد كبير من المواقع الإخبارية خلاهم حديث الساعة.

يا ترى إيه اللي حصل؟

في سنة 2020 ظهرت النجمة الجميلة منى جبر بعد إختفاء طويل، وده خلال تكريمها في مهرجان همسة الدولي، تكريم منى جبر كان السبب في ظهورها إعلاميًا بعد غياب وصل لـ 25 سنة عن أي وسيلة إعلامية.. 

ظهور منى جبر كان من الحجات الجميلة اللي الجمهور حبها في سنة عشرين، لكن في السنة اللي بعدها إتوفت البنت الوحيدة لأختها الفنانة ناهد جبر، وده اللي خلى إسمها يكون حديث وسائل الإعلام لفترة كبيرة، وبرغم انتشار الأخبار وسؤال الناس عن سبب إختفاء الفنانة ناهد جبر، إللا إنها ما ظهرتش على الإعلام ، وفضل الكلام عنها وعن بنتها يقل لحد ما اختفى نهائي..

طيب إيه اللي خلى النجمتين دول يختفوا مرة واحدة كده؟

الحقيقة إن السبب في الحالتين كان لأسباب شخصية، وممكن نقول إنه بسبب تحقيق الأحلام زي ما قالت الفنانة منى جبر في وقت تكريمها، واللي قالت إنها حققت كل اللي نفسها فيه من الفن .

 وان وجودها مع أبناءئها وأحفادها بيحسسها بمتعة كبيرة، وانها مبقتش حمل ضغط الشغل في الفن، بعد مسيرة ورحلة عمل طويلة، هنسردها سوا.

اختلفت منى وناهد جبر في أعمارهم، واختلفوا في دراستهم ، منى اتخرجت من  كلية الأداب وناهد اتخرجت من معهد السينما، و منى اشتغلت مذيعة في التلفزيون، وقدمت برامج مازالت محفورة في ذاكرة الجماهير ، زي برنامج اتنين ع الهوا، وبرنامج فن البالية.

لكن ناهد إختارت الإخراج،  وكان أول تجاربها في الإخراج فيلم إسمه راجل طيب عن قصة ليوسف السباعي، لكنا تجربتها في الإخراج ما كملتش ؛ وده لإنها إتجهت للتمثيل بعد ما اكتشفها  المخرج  حلمي حليم؛ واللي قدمها للسينما في دور فلاحة قدام شكري سرحان في فيلم إسمه حكاية من بلدنا، ومن هنا بدأت مسيرتها الفنية، وبعدت نهائي عن الإخراج .

اتوادت ناهد  جبر الأخت الصغيرة في يوليو سنة 45، أما الأخت الكبيرة منى ف اتولدت قبلها  بييجي سبع سنين في ديسمبرسنة 38.

 وبسبب إطلالتها الملائكية على الشاشة اتسابق عليها المخرجين علشان تدخل مجال التمثيل، وبالفعل وافقت وكان أول أدوارها في فيلم  السكرية، لكنها عملت بعده فيلم الحفيد مع عبد المنعم مدبولي وكريمة مختار واللي نجح نجاح كبير، ولحد النهاردة الناس لسة بتتكلم عنه..

بعدها واصلت الأختين نجاحهم الفني وقدموا أعمال متميزة في السينما والمسرح والتلفزيون.

قدمت  ناهد جبر عدد كبير من الأفلام السينمائية، زي الإنس والجن، والمنسي، والسقا مات وبنت بديعة، وسلطانة الطرب، وأيام العمر معدودة، ورجب فوق صفيح ساخن ، وغيرها.

أما في التلفزيون فبدأت ناهد جبر التمثيل للتلفزيون بمسلسل المسافرون، لكنها قدمت بعده عدد كبير من المسلسلات زي المال البنون، والهاربان، ورسالة إلى أبى، وسيداتي أنساتي ، وأبرياء في قفص الإتهام وغيرها..

كمان اشتغلت ناهد جبر في المسرح وقدمت أعمال ناجحة زي شاهد ما شافش حاجة، وهالة حبيبتي، ومن يضحك أخيرًا..

أما منى الأخت الكبيرة  فمقدمتش أدوار فنية كتير بالمقارنة باختها ناهد، لكن يحسبلها إنها كانت مركزة في الأعمال اللي ليها أهمية واللي ضافت قيمة عن الجمهور زي النداهة وخدعتني امرأة، وعندما يأتي المساء، والحب تحت المطر، وغيرها.

أما التلفزيون فقدمت فيه أدوار متميزة في مسلسلات من أروع مسلسلات التلفزيون، زي دورها اللي ميتنسيش في مسلسل الحرملك، وزي الحب وأشياء أخرى، وصيام صيام، وباقي من الزمن ساعة، وغيرهم.

كمان قدمت منى جبر بعض الأعمال المسرحية زي ..مسرحية الإبن الأكبروالدنيا مزيكا، والتعلب، وتلت جميلات والحب

نيجي بقى لقرار الإعتزال ، وده اللي بدأته منى جبر في التمانينات، ساعتها قررت إنها هتلبس الحجاب وهتقعد تراعي بيتها وأولادها، ومن وقتها وهيا بعدت تمامًا عن الوسط الفني، ومظهرتش غير أثناء تكريمها في مهرجان همسة الدولي سنة 2020

أما ناهد فقررت الإعتزال في بداية الألفينات، وبرضه لبست الحجاب واختفت نهائي عن الأضواء.

أما عن حياة الأختين الشخصية، فكل واحدة منهم اتجوزت مرتين، منى الأخت الكبيرة إتجوزت من راقص البالبة عبد المنعم كامل، أما الزوج التاني فكان المخرج هاني لاشين ، واللي خلفت منه أولادها التلاتة تامر ومي ومحمد.

ناهد كمان اتجوزت مرتين، المرة الأولى كانت من اللاعب والمدرب عصام بهيج، واللي خلفت منه بنتها الوحيدة مايسة، ودي اللي اتوفت السنة اللي فاتت بعد إصابتها بالكورونا زي ما قولتلك في البداية، وفاة مايسة بنت ناهد جبر كانت سبب صدمة نفسية كبيرة للفنانة ناهد جبر مقدرتش تتجاوزها لحد النهاردة.

أما زواجها التاني فكان من الممثل الراحل الدكتور سناء شافع، واللي انفصلت منه بسبب خيانته ليها، زي ما قال هوفي حوار تلفزيوني قبل وفاته.