السنة اللي فاتت، ظهرت معلومات بتقول إن مقتنيات الفنان نور الشريف بتتباع عند بتوع الروبابيكيا وع الرصيف، وده مع إن زوجته الفنانة بوسي نفت الكلام ده، وقالت إن العيلة محتفظة بمقتنياته لكنها أهدت مكتبة إسكندرية جزء منها.
وبدورها ردت المكتبة وقالت إن المقتنيات موجودة واللي عايز يشوفها يتفضل، لكن الناقد الفني عصام زكريا خرج، واتهم عيلة الفنان نور الشريف بإلإهمال الشديد، وقال انه إشترى من المقتنيات دي من علي الرصيف بنفسه.
في 2006 استقبل نور الشريف في بيته، مأذون المشاهير أحمد الدويك، وقاله. ع الباب.. خد بالك أنا مش عايز أطلق، ولما دخل المأذون للبيت قابل بوسي وقالها إنه ما جابش معاه الدفتر، وبدل ما يطلقهم قعد يصلح بينهم.
لكن تاني يوم كلمته الفنانة نورا اخت بوسي وقالتله الصلح فشل.. وفعلًا تم الطلاق، واتصدم الوسط الفني، واتصدم الجمهور، لإن نور الشريف وبوسي كانوا عنوان لقصة حب بتتحكي زي الحكايات.
لكنهم في 2015 رجعوا لبعض، ونفس المأذون هو اللي رجعهم، لكن للأسف مكنش في العمر بقية ومات نور الشريف بعدها ب8 شهور.
طبعًا معظم الجماهير العربية سألت عن سبب طلاق نور الشريف وبوسي، ودايمًا مكنش فيه إجابات مقنعة.
يمكن وقتها إتقالت إشاعات كتير، زي جواز نور الشريف في السر من الفنانة التونسية ساندي، وإن بوسي اكتشفت العلاقة دي فطلبت الطلاق..
ولأن بوسي و نور الشريف، الاتنين سكتوا وما قالوش إيه سبب الطلاق، فده خلى بعض الناس تصدق الإشاعة..
وجواز نور الشريف من ساندي مش هو الإشاعة الوحيدة في حياته، لإن بعد وفاته ظهرت إشاعة تانية، وهيا زواجه العرفي من الفنانة درة، وده اللي نفته درة.
لكن الإشاعة الأصعب في حياة نور الشريف كانت في 2009 ، وهيا اتهامه في قضية شبكة للشذوذ الجنسي..
والكلام ده جه في جريدة إسمها البلاغ، وقال الصحفي المسئول عن الخبر، إنه جاب الكلام ده من محضر التحقيقات اللي حصل مع أفراد الشبكة، واللي اتهموا شخصيات فنية بإنهم كانوا معاهم، ومنهم نور الشريف.
لكن في النهاية تم تكذيب الجريدة، وحبس الصحفي اللي كتب الخبر سنة، وتغريمه، ونور الشريف إسمه الحقيقي محمد جابر محمد عبدالله، إتولد في 28 أبريل سنة 44..
وإتولد في حي الخليفة بالقاهرة، وعاش يتيم بعد فاة والده وهو يادوب عمره سنة، وإتكفل عمه إسماعيل بتربيته، وعمه ده كان بيشبه شخصية عبد الغفور البرعي، واللي قدمها نور الشريف في مسلسل لن أعيش في جلباب أبي.
ولما اتوفى والد نور الشريف، كانت والدته عمرها 22 سنة، ولما قررت تتجوز، قرر العم إنه هيتكفل بولاد أخوه ويربيهم في بيته بعيد عن أمهم، لأنه مينفعش يتربوا مع جوز أم.
والقرار ده كان السبب في حرمان نور الشريف من والدته، ومعاملتها بقسوة لفترة كبيرة من عمره.
لكن الأم قررت إنها تخطفه من قدام المدرسة،علشان تشوفه، وهنا حضر جوز الأم مجموعة من أصحابه وراحوا قدام المدرسة وخطفوه، لكن صريخه لم عليهم الناس و خدوهم سلموهم للقسم، وعاش نور الشريف وأخته عواطف محرومين من الأب والأم، لكن كان العم بيعوضهم، وعمرهم ما حسوا معاه إنهم يتامى.
ونور الشريف وهو صغير كانوا بينادوه بإسم نور مش محمد، علشان كده لما اشتغل في السينما إختارتله إخته عواطف إسمه الفني، واللي هو نور الشريف، على إسم فنانها المفضل عمر الشريف.
واللي ميعرفهوش كتير من الناس إن نور الشريف في الأساس كان لعيب كورة، وكان ضمن فريق أشبال نادي الزمالك، ولولا إنه فضّل الفن على الرياضة، كان زمانه من أبطال الكورة المشهورين، زي الخطيب وحسن شحاته، ويمكن كان درب منتخب مصر.
بعد ما خلص نور الشريف الثانوية العامة دخل كلية التجارة، لكنه حاول يسيبها ويدخل المعهد العالي للفنون المسرحية، فأعمامه رفضوا.
لكنه أقنعهم إنه هيدخل قسم الديكور مش التمثيل فوافقوا، بعدها عرفوا إنه كذب عليهم، وإنه دخل تمثيل فمنعوه من المصروف لحد ما يرجع عن اللي هو عمله.
والحقيقة إنه مرجعش وعاند قصاد إسرته، واللي اتمسكت هيا كمان، وكان الحل عند صديق إسمه محمود الجوهري، اللي قرر يقسم معاه مصروفه، ومشيوا ع الوضع ده لفترة.
لكن نور الشريف حس إنه أصبح عبء تقيل على صديقه، فاضطر يشتغل كومبارس في المسرح علشان يوفر مصاريفه، وفضل ع الحال ده لحد ما اتخرج من المعهد سنة 67 بتقدير امتياز، وكان الأول على الدفعة، وكان ابتدا يشق طريقه في الفن..
قدم نور الشريف مسيرة طويلة ومميزة خلال مشواره الفني، وإتقال عنه إنه من أعظم الممثلين العرب اللي وقفوا قدام الكاميرا، وإنه من الفنانين إللي ما وقعش في فخ الجمهور عايز كده..
وبدايته كانت في أواخر الستينات، وقدم للسينما في حدود 180 فيلم، منهم جري الوحوش، ولاتبكي يا حبيب العمر، وقصر الشوق، والشيطان يعظ، وكتيبة الإعدام، وآخر الرجال المحترمين، وعنبر الموت، وعمارة يعقوبيان.
وبنفس النجاح اللي حققه في السينما واصل النجاح في التلفزيون، وقدم مجموعة من أهم المسلسلات، زي لن أعيش في جلباب أبي، وعمر ابن عبد العزيز، وهارون الرشيد، والفاتح صلاح الدين، والدالي وعرفة البحر، وغيرهم.
واشتغل نور الشريف للمسرح، وقدم لعبة السلطان، ويا غولة عينك حمرا، والقدس يوم آخر، وغير التمثيل فنور الشريف ليه تجارب في الإخراج المسرحي والسينمائي، وتجارب في تقديم البرامج التلفزيونية، زي برنامج وزنك دهب، وبرنامج مع نور الشريف.
وإتكرم بعدد كبير من الجوايز وشهادات القدير، منهم جايزة أحسن ممثل عن أكتر من فيلم، وجايزة التمثيل الدهبية من مهرجان نيودلهي بالهند،، وعنده 7 أفلام ضمن قايمة أفضل 100 فيلم مصري.
إتجوز الفنان نور الشريف سنة 72 من صافيناز مصطفى قدري أو الفنانة بوسي. وعندهم بنتين هما سارة ومي.
واتطلقوا في 2006، لكنهم رجعوا لبعض تاني سنة 2015، نفس السنة اللي اتوفى فيها، لإنه إتوفى في 11 أغسطس من نفس السنة، نتيجة سرطان الرئة، عن 69 سنة.
