إعلان

كريمة مختار قاطعتها عائلتها وكرمها الأزهر وأبكت مصر مرتين وزوجها فنان كبير وإبنها مذيع مشهور


في الدراما المصرية  كان فيه نمط معين لدور للأم، النمط ده مينفعش ان الممثلة اللي هتعمل دور الأم  تخرج عنه، ومن أول شروطه إن ملامح وشها تكون طيبة، مينفعش تكون محايدة، لازم تكون طيبة، وده اللي خلى كريمة مختار واحدة من أروع الأمهات اللي ظهروا على الشاشة سواء السينما اوالمسرح أو التلفزيون، ومش كده وبس، دي سعات الجمهور كان بيعتبرها أمه هو شخصيًا، ومن كتر صدقها اتكرمت عن دور الأم ده أكتر من مرة.

يمكن هتستغرب لما تعرف إن كريمة مختار بدأت حياتها الفنية من مرحلة الصوت وبس، كانت وقتها بتعمل آداء صوتي في برنامج الأطفال المشهور جدًا  بابا شارو، الكلام ده كان في بداية الخمسينات.

لكن لما جت الفرصة لكريمة مختار إنها تمثل قدام الكاميرا وتتشهر، وعلى الرغم من إنها خريجة فنون مسرحية، إللا إن أهلها الصعايدة، واللي بيرجع اصولهم لساحل سليم في أسيوط رفضوا إنها تشتغل في التمثيل،  وفضلت تشتغل بصوتها بس في الإذاعة، وتمثل بيه كل المشاعر والأحاسيس اللي ما بيقدرش الجمهور يشوفها من ورا الميكروفون.

لكن كل ده اتغير بعد ما اتجوزت من  المخرج نور الدمرداش سنة 58 لأنه كزوج كان موافق إن مراته تمثل وكان مقتنع بموهبتها جدًا.

اتولدت عطيات محمد البدري، أو كريمة مختار في يوليو سنة 34، وفيه معلومات بتقول إنها اتولدت في يناير مش يوليو، لكن السنة هيا هيا.

 أما أول عمل فني تشترك فيه فكان فيلم إسمه تمن الحرية،  وكان طبعًا من إخراج جوزها نور الدمرداش.

 لكن الغريب إنها عملت في الفيلم ده دور أم رغم سنها الصغير، وكانت متميزة فيه جدًا..

بعدها شاركت كريمة مختار في بطولة عدد كبير من الأفلام، وفي الغالبية العظمى منهم كانت بتعمل شخصية الأم المصرية الطيبة.

 الأفلام دي زي أميرة حبي أنا، و الحفيد و رجل فقد عقله، و يارب ولد، والليلة الموعودة، واسماعيلية رايح جاي و سعد اليتيم، والفرح، وساعة ونص.وغيرهم

وفي التلفزيون كمان كانت كريمة مختار من أوائل الممثلات اللي قدموا فيه دور الأم باقتدار،  زي مسلسلات صابر يا عم صابر، وفي حاجة غلط، والليلة الموعودة و ويتربى في عزو،  والبخيل وأنا وزهرة وأزواجها الخمسة وغيرهم..

أما في المسرح، فـ أول  حاجة تيجي في دماغك لما تذكر أعمالها المسرحية؛ هو دور زينب في العيال كبرت.

ومش عايز أفاجئك وأقولك إن الدور ما كانش بتاعها أصلًا، وكان فيه فنانة غيرها هيا اللي بتعمله لـ 3 سنين كاملة، الفنانة دي هيا الفنانة  الكبيرة نبيلة السيد، ولما اعتذرت نبيلة السيد عن الشغل بعد 3 سنين، الدور راح لكريمة مختار واتسجل الدور كعلامة مميزة في المسرح المصري بإسم كريمة مختار..

لكن قبل العيال كبرت كان ليها مشاركات كتير مع فرق مسارح الدولة ، وعملت معاهم مسرحية الأرض مع فرقة المسرح الحديث، وعملت مجنون ليلى مع فرقة المسرح العالمي، وقيس ولبنى مع فرقة المسرح القومي، ونور الظلام مع مسرح الحكيم، وأيوب الجديد مع مسرح الطليعة..

ده غير عدد من المسرحيات اشتغلتها مع فرق المسرح الخاص فهتلاقيها  شاركت مع فرقة "أنصار التمثيل والسينما في تقديم مسرحية"كسبنا القضية"، كمان شاركت مع فرقة "المسرح الحر في مسرحية ميرامار، وقدمت مسرحية "بداية ونهاية" ومسرحية ملاعيب مع فرقة محمد فوزي.وغيرهم..

ومع إن أدوارها كلها مميزة وناجحة، لكن شخصية ماما نونة اللي عملتها في مسلسل يتربى في عزو مع يحي الفخراني، كانت من الأدوار اللي علقت بشكل كبير مع الناس، واتكلمت عنها كل برامج الفضائيات وقتها،واللي قالوا إن الشخصية كانت صادقة جدًا.

 وإن الفنانة كريمة مختار كانت أكتر صدقًا في الدور، لأنها بتفكرهم بشخصية الأم المصرية  الطيبة والبسيطة، واللي بتحب ابنها بجنون، ومتقدرش ترفضله طلب رغم انه عدى الستين، وفي النهاية اتصدم المشاهدين بعد وفاتها بسبب تهور إبنها ودلعه.

والدور ده تحديدًا كان سبب تكريم كريمة مختار أكتر من مرة، وفازت بجايزة أحسن ممثلة للعرض الأرضي، وكمان احسن ممثلة للعرض الفضائي، الجايزتين كانوا عن نفس دورها في مسلسل يتربى في عزو.

كمان أخدت جايزة النقاد عن دورها في فيلم ومضى قطار العمر، كمان كان فيه اعتراف بفضلها على الدراما المصرية، وده حصل في 16 يناير اللي فات لما احتفل مؤشر البحث جوجل بعيد ميلاد الفنانة المصرية الراحلة كريمة مختار، وقال إنها تعتبر واحدة من أبرز الممثلات في جيلها.


أما عن حياتها الشخصية ، فهيا ارتبطت بعلاقة حب مع المخرج الكبير نور الدمردش، وكللوا الحب ده بالجواز سنة 54، واكتملت فرحتهم بأربع ولاد، هما معتزالدمرداش المذيع المشهور، وشريف وده مهندس ملوش علاقة بالفن،  وأحمد  وده ممثل، وهبة ودي دكتورة أمراض جلدية.

وإتوفت الأم الحنونة كريمة مختار، في 12 يناير 2017 عن عمر 82 سنة، قضت أكتر من نصهم  وهيا أم لكل المصريين والعرب..