إعلان

محرم فؤاد قضية منافية أنهت مسيرته وشادية رفضت العمل معه وخاف منه العندليب وسر زواجه من الجميلات


عارف النشيد الوطني ؟ أيوة هو بتاع بلادي بلادي لكي حبي وفؤادي، طب انت عارف هو ليه النشيد ده بقى النشيد الوطني لجمهورية مصر العربية؟ 

السبب ان كان فيه مطرب مشهور بيغنيه بشكل دايم، فـ أعجب بيه الرئيس السادات وقرر إنه يبقى هو النشيد الوطني، المطرب ده مش سيد درويش لأنه كان مات وشبع موت وقتها، المطرب ده كان محرم فؤاد..

المغنواتي، أو فنان النيل، أو الفنان محرم فؤاد ؛  فنان ليه طبيعة خاصة ,متقدرش تصنفه، يعني لاينفع تقول مطرب شعبي ولا مطرب رومانسي، هو توليفة ما بين الاتنين، حتى الوقت اللي طلع فيه كان وقت غريب جدًا\ لأنه عاصر العمالقة محمد عبد الوهاب، وام كلثوم وعبد الحليم، وعاصر الجيل اللي بعد كده، زي هاني شاكر وماهر العطار والعزبي ورشدي، وعاصر اللي بعدهم زي على الحجار ومدحت صالح وإيمان البحر درويش..

اتولد محرم فؤاد سنة 34 في بولاق الدكرور في القاهرة ، لكنه في الأساس من سوهاج، كان والده مهندس عنده 8 أولاد، ومحرم فؤاد  كان أصغرهم وكان صاحب رقم 9، وطبعًا آخر العنقود كان بيقى ليه امتيازات مش عند حد من اخواته.

إتعلم محرم فؤاد الغنا وهو لسه صغير، وغني من وهو أربع سنين،  وكان في كل مناسبة يقول بصوته الأناشيد الدينية، سواء في المدرسة ، او في مناسبات العيلة والجيران.

ومن الصدف إن كورال مدرسته غنى  قدام الملك فاروق، واعجب بيه الملك وقتها، وإتسمى إبن الملك..

إتوفى والده وهو لسه يادوب حداشر سنة،  فقرر إنه يشتغل ويغني في الأفراح، ومع شهرته وإعجاب النناس بصوته قرر إنه يتعلم الغنا على أصوله، ويدخل معهد الموسيقى العربية.

وفي المعهد إتعلم حجات كتير غير الغنا، اتعلم التلحين  والعزف، وبقى من أفضل العازفين على العود، واشتهر كمطرب وملحن من خلال حفلات المعهد، والحفلات الخاصة.

وبعد ما اتخرج من المعهد انضم لركن الهواة في الإذاعة وغنى ولحن مجموعة من الأغاني لسه عايشة لحد النهاردة، زي الحلو هداني منديله، وأسمر وحليوة، وخيالك في عيني، واعتمدته الإذاعة بإغنية زي نور الشمس حبي وتنكره..

بعد اعتماده كمطرب ودخوله لعالم الفن بقوة وثقة؛  إكتشفه المخرج بركات وقدمه كممثل من خلال فيلم حسن ونعيمة، الفيلم اللي أنتجه الموسيقار الكبير محمد عبدالوهاب، وحقق نجاح كبير جدًا ؛ على الرغم من إنها كانت التجربة الأولى لمحرم فؤاد كبطل،  وللبطلة سعاد حسني، واللي كانت لسه وجه جديد..

ومن وقتها ومحرم فؤاد اتحط على قايمة المطربين المهمين في مصر والدول العربية، ده غير كونه ممثل تقيل بتجري وراه شركات الإنتاج..

قدم محرم فؤاد مجموعة كبيرة من الأغاني العاطفية والشعبية والوطنية، وصل رصيده فيها لأكتر من 900 أغنية ، منها  أغنية الحلوة داير شباكها، يا غزال يا اسكندرني، وشوفت بعيني، ومراسيل، وأجمل صباح عندي، ورمش عينه، واشكي لمين ،  وكيدنا العوازل وغيرهم.

 ده غير 13 فيلم قدمهم للسينما من أهمهم حسن ونعيمة، ووداعا يا حب، ونصف عذراء، ولحن السعادة، ومن غير ميعاد، وغيرهم..

كمان اشتغل محرم فؤاد للمسرح وقدم مسرحيتين الأولى كانت بإسم دنيا البيانولا، والتانية كان إسمها القشاط.

إستحق محرم فؤاد التكريم عن مشواره الفني الكبير، وحصل على عدد كبير من الجوايز والتكريمات ، من أهمها وسام الاستقلال ، وده اللي اخده من الأردن سنة  65، ده غير انه أخد شهادة تقدير من الملك الحسن التانى ملك المغرب سنة 69.

أما عن حياته الشخصية فـ اتجوز الفنان محرم فؤاد سبع مرات، كانت الأولى من الفنانة تحية كاريوكا، بعدها اتجوز من سيدة أجنبية، وبعدها اتجوز للمرة التالتة من اللبنانية ماجدة بيضون، ودي اللي خلف منها إبنه الوحيد طارق.

وبيتقال إن سبب طلاقه من أم إبنه هو جوازه السري من الفنانة ميرفت أمين، لكن المعلومة دي مفيش أي دليل يأكدها ، ده غير ان الفنانة ميرفت أمين نفت الموضوع.

بعدها اتجوز من ملكة جمال الكون اللبنانية جورجينا رزق، واللي عمل معاها فيلم الملكة وأنا، وحب في أثناء التصويروخرجوا من الفيلم متجوزين، لكنه برضه جواز كان مكتوب على ورقة طلاق، وانفصلوا واتجوز بعدها الفنانة عايدة رياض.

جواز محرم فؤاد وعايدة رياض استمر 12 سنة، وفيه حكايتين للطلاق، الأولى كانت القبض علي عايدة رياض  في قضية أداب، أما التانية فكانت الغيرة الشديدة على عايدة رياض، ومحاولة منعها من التمثيل.

 على أي حال، ومهما كان السبب، فاللي حصل بعد الطلاق كان مآساة،  لأن محرم فؤاد اتصاب بالإكتئاب، وفضل إنه يبعد عن الساحة الفنية ، ويعتزل أصحابه، ويعتزل الغنا نهائي.

لكنه رجع بعد فترة من الإكتئاب، وغني من جديد واتجوز من المذيعة مني هلال، ودي الزوجة اللي كملت معاه لآخر عمره..

إتوفى الفنان الكبير محرم فؤاد بسبب مرض القلب، وبعد ماعمل أكتر من عملية في الخارج، ده غير إنه اشتكى من مرض الكلى في آخر أيامه وسلم الروح لبارئها سنة 2002، وكان عنده وقتها 68 سنة.