الفنانة عبلة كامل من الفنانات المصريات اللي ليها بصمة مختلفة عن اي فنانة تانية، فنانة مبتعرفش تمثل، وده لأنها المادة الخام للتلقائية، إنت على طول الوقت مصدقها، على طول قابلها، وعلى طول واقف جنبها لأنها عمرها ما خيبت ظنك فيها..
فيه فنانين كده عدوا على مصر تقدر تقول نوادر، مايختلفش عليهم إتنين، وبرضه مايتكرروش، كل واحد منهم واقف في حتة لوحده، حتة بتاعته، مينفعش حد يقف فيها معاه، ولا حد يشاركه فيها.
من بين الفنانين دول الفنانة عبلة كامل، المادة الخام للتلقائية، والفنانة اللي حبها الجمهور من أول مشهد، واللي كان من خلال مونودراما إسمها نوبة صحيان..
وعبلة كامل من الفنانات أصحاب الوزن التقيل، واللي صعب حد تاني يقوم بدورها، لأنها ملهاش شبيه، ولما بتغيب بتسيب فراغ كبي، محدش يقدر يملاه..
كمان هيا فنانة من الفنانات اللي اكدت قدرتها على آداء الأدوار الصعبة بسهولة غريبة، ورغم اختلاف الأدوار اللي قدمتها، إللا إنهم ليهم نفس البصمة المبهرة، واللي بتخش القلب من غير استئذان..
تقدر تفتكربكل سهولة تفاصيل دور سنية في مسرحية وجهة نظر مع محمد صبحي، وتقدر تضحك من قلبك في كل مرة بتشوفها فيه، وكإنها المرة الأولى.
كمان تقدر تقتكر دور ليلى في وداعًا بونابرت للمخرج يوسف شاهين، واللا دور فاتن في التعويذة، أو سليمة في عرق البلح، وفرنسا في اللمبي، وفاطمة كشري في لن أعيش في جلباب أبي وغيرهم وغيرهم.
طيب تفتكر إيه العامل المشترك في كل الأدوار اللي قولتلك عليها دي؟
الحقيقة ان كل الأعمال دي أعمال على مستوى عالي جدًا، أعمال مميزة وعلامة من العلامات المهمة في تاريخ الفن المصري، واللي اشترك فيه كانوا من كبار الفنانين.
أهي هيا دي طريقة إختيار عبلة كامل لأدوارها، دايمًا كانت بتدور على الكيف مش الكم، وده واحد من الأسباب اللي خلقت لها مكانة كبيرة عند المشاهد المصري والعربي.
ولو هتسأل عن باقي الأسباب فمن أهمهم إحترامها لنفسها وللمشاهد، وعدم إنجراراها لأدوار أو مشاهد تقلل من احترامها لنفسها، أو تقلل من احترام المشاهد ليها، وحاجة تانية مهمة إنها مابتهتمش بمساحيق التجميل، وده خلق إنطباع عند الناس إنها من أصدق وأجمل الفنانات..
حتى لما قررت تلبس الحجاب، قدمت أدوار ماشية تمامًا مع الحجاب ووقاره، حللدرجة اللي خلت الحجاب كإنه جزء من الدور مينفعش يتعمل من غيره.
اتولدت عبلة كامل في قرية نكلا العنب بمحافظة البحيرة في 17 سبتمبر سنة 60.
ودرست واتخرجت من كلية الآداب قسم المكتبات.
أما حياتها الفنية فـ ابتدتها من مسرح الطليعة، وبعدها بقت تعمل أدوار صغيرة في بعض الأعمال، لكن شهرتها الكبيرة كانت بعد اشتراكها في مسرحية وجهة نظر مع محمد صبحي..
بعد كده شقت عبلة كامل طريقها للنجومية واشتركت في عدد كبير من أهم الأفلام، زي وداعًا بونابرت، واليوم السادس، وسواق الهانم، ويوم حلو ويوم مر، ونهر الخوف، وقشر البندق وهيستيريا. وغيرهم.
وزي ما اتألقت في السينما كان ليها حضور خاص في التلفزيون، من خلال مجموعة من أنجح المسلسلات، زي الشهد والدموع، وليالي الحلمية، و لن أعيش في جلباب أبي، وضمير أبلة حكمت، والمال والبنون، ودموع صاحبة الجلالة ، وسلسال الدم وغيرهم..
ويمكن العناوين اللي ذكرتها و اللي جتى مذكرتهاش، كلها لأهم المسلسلات اللي اتعملت في تاريخ التليفزيون، وده إذا كان بيدل على شىء فبيدل على إختيارات ذكية جدًا، وانتقاء للنوعية اللي هتخرج من خلالها للجمهور، ولكيفية اللي هتخرج بيها..
أما في المسرح فقدمت عبلة كامل فيه عدد من الأعمال المهمة، في عدد من المسرحيات الناجحة، زي وجهة نظر، وعفريت لكل مواطن، وغراميات عطوة أبو مطوة، واعقل يا دكتور، والحادثة المجنونة وغيرهم..
ورغم مشوارها المميز وأعمالها الفنية المهمة، وحب الجمهور ليها، إللا إن عبلة كامل إختفت فجأة عن الساحة الفنية بعد تقديمها للجزء الأخير من مسلسل سلسال الدم.
واختفائها فجآة حير الجمهور و فتح باب الاشاعات..
اللي يقول مريضة بمرض خطير، واللي يقول إعتزلت ومش هتمثل تاني، واللي يقول جالها زهايمرومبقتش فاكرة حاجة.
لكن نقيب الممثلين أشرف زكي طمن الناس، وده بعد ما خرج في تصريح وقال إن الفنانة عبلة كامل بخير، هيا بس مش عارفة تخرج من أحزانها بعد وفاة أعز صديقاتها، وإنها ما اعتزلتش، لكنها مش عارفة هترجع إمتى..
كمان أشرف ذكي كان مرشحها للتكريم في مهرجان القاهرة للدراما، لكنها اعتذرت وقالت إنها مش مستعدة حاليًا، وطلبت تأجيله للدورة الجاية..
ونييجي للحياة الشخضية لعبلة كامل، وهيا اتجوزت مرتين، الأولى كانت من الفنان والمخرج أحمد كمال، وده اللي خلفت منه بناتها زينب وفاطمة، وهما توأم بالمناسبة، والاتنين اتجوزوا من أجانب، فـ زينب متجوزة من إنجليزي، وفاطمة متجوزة من بولندي..
أما الزوج التاني للفنانة عبلة كامل فكان الفنان محمود الجندي، لكن الجوازة دي ما قعدتش كتير وانتهت بالانفصال.
