شوفت اللي اشترى التروماي؟؟
دي مش جملة وخلاص بنتريق بيها على اللي انضحك عليه في موقف واللا فـ بيعة، واوعى تفتكر إن الريان واللا المستريحين اللي طلعولنا في البخت؛ كان ليهم السبق ف موضوع الضحك علي الناس وخطف فلوسهم، وفي لحظة يبقوا فص ملح وداب؟
أبسليوتلي.. الموضوع قديم.. اختراع يا كوتش.. وحقوق الملكية متسجلة سنة 46 بإسم رمضان أبوزيد العبد.
في سنة 48 خرج من السجن رمضان أبو زيد العبد، تخيل أنت يحط رجله برة باب السجن يلاقي صحفيين ومصورين مصريين وأجانب، إنت فـ لحظة ممكن تفتكر إن ده مثلًا أحمد زويل وهو لسه نازل من طيارة السويد؛ بعد ما استلم جايزة نوبل.
لكن الحقيقة إن الليلة دي كلها لأن الشخص ده كان أشهر نصاب في العالم وقتها، والحقيقة عملية النصب بتاعته كانت مختلفة ودمها خفيف، وحكت عنها مجلات وجرانين كتير جوة وبرة مصر.
عمل إيه بقى عمنا أبو زيد ده؟؟ بص ياسيدي، رمضان أبو زيد في الأساس نصاب، ليه شوية جرايم كلها نصب واحتيال ، وطبعًا ليه سوابق وصحيفته الجنائية ماشاء الله عمرانه.
لكنه كان في مرة راكب تروماي 30، وده كان بيتحرك من منطقة القصر العيني، و بطرف عينه فرز الناس اللي حواليه، وف ثانية كان منقي منهم الضحية بتاعته..
فلاح غلبان حاطط إيده على صدره ، وشكله بيقول إنه بيحمي فلوس مخبيها فـ جيب الصديري خايف عليها السرقة.
طبعًا شكل عمنا الغلبان ده بيقول إنه على قده، وانه سهل الواحد يوديه البحر ويرجعه عطشان.
وقد كان..
قرب منه رمضان واداله سجارة واتعرف عليه..
محسوبك على ، اسم الكريم إيه؟
الراجل الغلبان مد إيده وخد السيجارة، وابتسم ابتسامة فيها طيبة أهل الريف وقاله حفظ الله، حفظ الله سليمان..
وسجارة في سجارة، وكلمتين من هنا على جملتين من هناك، عرف عمنا رمضان إن حفظ الله الغلبان ده بايع كل اللي حيلته في البلد وجاي يشغل فلوسه في أي مشروع في القاهرة..
طبعًا رمضان مكدبش خبر وقعد يديله في افكار مشاريع والراجل مش عاجبه حاجة..
بصراحة رمضان مكنش في دماغه ساعتها إنه يبيعله التروماي، هو كان هيثبته في أي مشروع من دول وينصب عليه وياخد الفلوس، لكن الراجل معجبهوش كل اللي قال عليه..
ولجل القدر يعمى البصر زي مابيقوله، وهنا خرجت من الراجل جملة إيه الزحمة دي؟؟ يقصد يعني ان التروماي زحمة أوي..
وهوب اللمبة نورت في دماغ رمضان وقاله في نفس اللحظة:
إيه رأيك تشتريه؟؟
الراجل تنح دقيقة كده وهو مش مستوعب، فراح رمضان ضارب عالحديد وهو سخن؛ وقايله أهي الزحمة دي بتخليه يكسب كتير جدًا..
وكل المكسب ده هيبقى في جيبك آخر النهار..
الراجل ابتسم وسكت كإنه بيتخيل نفسه وهو كل يوم بيقبض حصيلة كل الناس اللي راكبة الترماي، وفعلًا وافق، وسأله هتديهوني بكام؟
فرمضان قاله : واللهِ هو بألف جنيه، بس عشان إنت بلدياتي هديهولك بـ 200 جنيه، لكن بشرط، إن أنا كل ما اركب ما ادفعش..
الراجل قاله عيب عليك ده ملك أخوك، تركب في أي وقت.
وعشان اللعبة تكمل أخده رمضان وراحوا على قهوة كتبوا العقد، وراحوا عند محامي سجلوه، بس وقتها المحامي طبعًا مكنش عارف إنه بيسجل عقد بيع التروماي، وبعدها راحوا لمحطة العتبة، واستنوا التروماي رقم 30 عشان يسلمه ملكه..
التروماي جه، والاتنين ركبوا، ولما عدا الكومساري، وقفله النصاب واداله قرش بحاله، والقرش ده كان زي العشرة جنيه دلوقتي.
إداله القرش وقاله خلي الباقي علشانك، كان الباقي تقريبًا اتنين مليم.. زمن الملاليم بقى.
المهم قاله خلى الباقي علشانك، وخد بالك من بلدياتي ده هينزل معاك آخر الخط، وشاور على حفظ الله.
الكمساري طبعاً ابتسم لحفظ الله وهزله دماغه وراح يكمل شغله، والنصاب برضه راح يكمل شغله، وساعتها ميل و قال لحفظ الله إنه يستنى لحد آخر الخط، وبعدها يروح للكمساري يطلب منه الإيراد كامل، ونزل رمضان وساب الراجل الغلبان قاعد مبسوط على الكرسي وهو بيتابع سير مشروعه .
وصل التروماي لنهاية الخط ؛ وقام حفظ الله للكمساري يطلب الإيراد والكمساري مش فاهم، لحد ما قامت خناقة وضربوا بعض وراحوا هما الاتنين القسم.
وفي القسم صمم حفظ الله وحلف براس أبوه إنه يلغي البيعة عقابًا للكمساري، وده اللي خلى كل اللي في القسم يضحكوا من سذاجة الراجل وذكاء النصاب.
طبعًا القصة اتعرفت واتشهرت بسبب عبقرية الفكرة، وبسبب سذاجة المشتري.
وطبعًا النصاب اتجاب واتسجن لمدة سنتين، لأنه كان معروف وطريقته في النصب معروفة، ف البوليس ما أخدش وقت في القبض عليه ومحاكمته وسجنه.
لكنه وهو في السجن كانت القصة خرجت برة مصر؛ و اتعرفت في مناطق كتير من العالم، وده اللي خلى الصحفيين يستنوه على باب السجن وهو خارج ويطلبوا يعملوا حوارات صحفية معاه، وسموه وقتها باللص الظريف.
والموضوع ما وقفش عند شوية لقاءات صحفية وصور وكده، دي القصة اتعملت فيلم من أنجح الأفلام السينمائية، وقام بدوره كمان فنان كان أصله ظابط، وهو الفنان الكبير أحمد مظهر.
أما حفظ الله سليمان اللي اشترى التروماي، فقام بدوره إسماعيل يس، لكنه في الفيلم ما اشتراش التروماي وبس، ده اشترا ميدان العتبة باللي فيه..
