إعلان

آخر ظهور للفنان فريد شوقى مع بناته الخمسة وهدى سلطان تكشف عن الوجه الآخر لوحش الشاشة

 
سيطر في شبابه على أدوار البطل والفتوة اللي مكانش حد يقدر يهزمه وآطلق عليه عدة ألقاب منها وحش الشاشة وملك الترسو هو العظيم " فريد شوقي " اللي فضل على مدار 50 سنة متربع على عرش البطولة وقدم خلالها حوالي 400 عمل فني. 

 
 تعالوا نعرف مع بعض أسرار مهمة عن حياة فريد شوقي الشخصية وسر حبه للنساء ومعلومات هتكشفلكم الجانب الآخر من حياته. 
 
 
 إتولد فريد يوم 30 يوليو سنة 192 بحي السيدة زينب.
 إسمه بالكامل فريد محمد شوقي عبده .
 حصل على دبلوم معهد الهندسة التطبيقية ودبلوم معهد التمثيل . 
 بدأ مسيرته من خلال أدوار صغيرة مع الفنان (أنور وجدي)، وبعدها بدأ يكتب قصص سينمائية وتوالت أعماله حتى حقق نجومية كبيرة وأصبح الملك. 
 
وإنتقالا لحياة وحش الشاشة ونسائه إعترف في حوار قديم مع الإعلامي عمرو أديب بحبه الكبير للمرأة وقال "أنه بيحب المرأة جدًا ومايقدرش يعيش من غيرها مش لسبب محدد لكن بيحس بالونس والأمان في قربهم لإنه أتربى بين أم وأب طوال ال60 سنة مافرقهمش غير الموت ووالده عمره ما زعل والدته ولا هى كمان زعلته ولا في يوم أخدت شنطتها وغضبت عند أهلها، فعاش في بيت سليم، وأسرة سليمة وأمومة سليمة، علشان كده تزوج لأول مرة قبل سن العشرين. 
 
لكن فريد شوقي كان عنده مواصفات للمرأة اللي هيتزوجها وهي إنه لازم يحس منها إنها شريكة فعلية في كل أفكاره ويكون ليها رأي وبسبب دة تزوج 5 مرات وأنجب 5 بنات.
 
 المرة الأولى كانت من خارج الوسط الفني وهو عمره 18 سنة لكنه إنفصل عنها بعد فترة قصيرة. 
 
 وزوجته التانية هى زينب عبدالهادي اللي وقع في حبها لأول مرة في واحدة من العروض المسرحية عن رواية "نهر الجنون" لتوفيق الحكيم، ولكنها في البداية مبادلتهوش الحب فهددها بالإنتحار وصدقته وفي النهاية تزوجوا، وأنجبوا إبنتهم " منى " لكنها كانت بتغير عليه جدًا ورفضت أنه يستقيل من وظيفته كمهندس بمصلحة الأملاك ويتفرغ للفن، وده خلاه يستمر في عمله لمدة 8 سنوات،وفي النهاية قرر الإنفصال عنها. 
 
 وتزوج أيضا من راقصة إسمها سنية شوقي، ولكن إنفصل عنها بناءً على نصيحة الفنان يوسف وهبي بسبب غيرتها الشديدة عليه من المعجبات. 
 
بعدها قابل الفنانة هدى سلطان في فيلم "حكم القوي"، وحس بإنجذاب كبير ليها ، لدرجة أنه كان بيكتب لها جوابات ويحطها تحت باب اوضتها في الاستوديو، لكن هدى مكانتش بتحب أن حد يتكلم عن سمعتها، فكانت بترفض أن فريد يتكلم معاها أو يوصلها لبيتها بعربيته زي ماكان بيطلب منها ، لحد ماعرض عليها الزواج فوافقت وتزوجوا وعاشوا حياة ناجحة على المستوى الشخصي والفني، وأنجبوا بنتين وهما " ناهد ومها " وإشتغلوا مع بعض في عدة أفلام سينمائية، جعلتهم أشهر ثنائي في السينما المصرية، وفي فترة قرر السفره للعمل في لبنان وتركيا، ودة أثر على شكل علاقتهم بجانب الشائعات عن علاقات فريد النسائية، فأصرت وقتها هدى على الانفصال. 
 
بالرغم من قوته وشراسته اللي إشتهر بها واللي حصل بسببها على لقب وحش الشاشة كان في جوانب تانية مايعرفهاش الجمهور كشفتها الفنانة الكبيرة هدى سلطان وحكت عن مواقف ليه تحت عنوان " وحش الشاشة بلا أنياب فقالت "أن زوجها يتقن تمثيل الأدوار الشريرة لكنه في الحقيقة يتمتع بقلب كبير مليان رقة وحنان وإنسانية ".
 
 وأضافت أن ممنوع على الطباخ أن يذبح فرخة أثناء وجود فريد داخل البيت ، وموقف تاني كان أول مرة يركب فيها طيارة وفضل قبلها يقرأ القرآن الكريم، وبمجرد لما طارت في الجو أصفر وشه مسك بطنه وفضل يتلوى من الألم ولم يهدأ إلا بعد هبوط الطائرة.
 
 وموقف كمان قالت أثناء نزولهم في أحد الفنادق في بيروت بالليل وقت نومهم صحى فريد خايف وصحاها قالها "هدى قومى فيه حاجة وحشة على السرير". 
 
فإستدعى الخدم وفتشوا السرير حتى وجدوا صرصار كان الخادم هيقتله ولكن صرخ فيه فريد، وقاله " اوعى تقتله هنا، خده برة الأوضة واعمل اللى انت عاوزه، انا ماقدرش أشوف حد بيتقتل قدامى حتى لو صرصار". 
ومواقف تانية كتير حكتها هدى عن حنية قلبه. 
 
ورجوعًا لقصة زواجه فزيجته الأخيرة واللي إستمرت حتى وفاته كانت من سهير ترك، الشابة اللي إتعرف عليها أثناء تقديمه مسرحية "الدلوعة" سنة 1968، ودخلت سلمت عليه كمعجبة، وإتكلمت معاه عن إعجابها بأعماله، لكن وقتها فريد لمس اهتمامها به لإنها كانت عارفة معظم أعماله، فتطورت علاقتهم وحرصت إنها تكلمه بعد كل فيلم ليه وتقوله وده طبعًا جذب إنتباه فريد ليها " وعرض عليها الزواج سنة 1970 وأنجبوا بنتين وهما " رانيا وعبير " وأستمر زواجهم وفضلت جمبة في مرضة. 
 
 يوم 27 يوليو سنة1998 رحل عن عالمنا عن عمر يناهز 78 سنة بعد صراعه مع مرض إلتهاب رئوي بسبب شراهته في التدخين وكانت جنازته ضخمه حضرتها كل نجوم الفن وجمهوره ، رحم الله العظيم فريد شوقي الذي أمتعنا بأعمال لاتنسى وظلت وستظل خالدة إلى الأبد.